काठमाडौं,१५ साउन /आज नेकपा माओवादी केन्द्रको स्थायी कमिटी बैठक दिउँसो ३ बजे पेरिसडाँडामा बस्दैछ। स्थायी कमिटीकै पूर्णता, पोलिटब्युरो चयन तथा पदाधिकारी चयनलगायत विषयमा छलफल गर्न बैठक बस्न लागेको नेता हरिबोल गजुरेलले जानकारी दिए।
माओवादीले अहिलेसम्म स्थायी कमिटीलाई पनि पूर्णता दिन सकेको छैन्। ४१ सदस्यीय हुनुपर्नेमा हाल जम्मा २५ जना मात्रै चयन भएका छन्। स्थायी कमिटीलाई पूर्णता दिएर आजै पोलिटब्युरो चयन हुने बताइएको छ।
यस्तै माओवादीले आज जनार्दन शर्मालाई फेरि अर्थमन्त्रीको जिम्मेवारीमा फर्काउने निर्णय गर्दैछ। बजेट निमार्णका क्रममा अनधिकृत व्यक्तिलाई प्रवेश गराएको भन्ने आरोप पुष्टि नभएपछि अर्थमन्त्रीबाट राजीनामा दिएका शर्मालाई नै माओवादी केन्द्रले फेरि जिम्मेवारीमा पठाउने तयारी गरेको हो।
स्थायी कमिटी बैठकले शर्मालाई पुनस् जिम्मेवारीमा फर्काउन सिफारिस गर्ने नेता गजुरेलले बताए।